- जसले संविधान मानेको जस्तो देखाउँछ । जसले चुनावमा गएजस्तो गर्छ । यसले ४६ सालको आन्दोलन मान्दैन । ६२/६३ सालको आन्दोलन मान्दैन । हाम्रो संघर्षको उपहास गर्छ । यसले विधि मान्दैन । प्रक्रिया मान्दैन ।
- एउटा नेपाली नागरिकले सहकारीमा ठगे दण्ड हुन्छ । भ्रष्टाचारी भिआइपी हुँदैन । ठग भिआइपी हुन सक्दैन । अराजक भिआइपी हुँदैन
- ऊ जादूगर बनेर आउँछ । लोकरिझ्याइँ गर्दै संविधानमाथि प्रहार गर्छ । अर्को पार्टीको साथीले भन्न पाउनुहुन्छ । यी त मानिसहरु हुन् । म त भगवान हुँ । मेरो त १० वटा हात छ । मेरो त १० वटा टाउको छन् । म त जादूगर हुँ । मसँग अचुक अस्त्र छ । म रातारात कायपलट गर्दिन्छु । चमत्कार गर्छु ।
काठमाडौं– नेपाली कांग्रेसका महामन्त्री गगन थापाले राजावादी र राष्ट्रिय स्वतन्त्र पार्टीबाट संविधानमाथि प्रहार सुरू भएको आरोप लगाएका छन् । राजावादी दलले पहिलेबाटै र रास्वपाले जनताको संघर्षको उपहास गर्दै संविधानमाथि प्रहार गरिरहेको गगनले आरोप लगाएका हुन् ।
‘संविधानलाई कयौं कोणबाट प्रहार भइरहेको छ । यस्तो अवरोधहरु आइराख्छ । अवरोध चिनौं र चिरौं । एउटा पात्र छ जसलाई हामीले नहराएका पनि होइन । उसको हातबाट खोसेर हामीले जनतालाई हक दिएका छांै,’ शुक्रबार महामन्त्री थापाले भने, ‘संविधानमाथि प्रहार गर्ने अर्को प्रवृत्ति आएको छ । जसले संविधान मानेको जस्तो देखाउँछ । जसले चुनावमा गएजस्तो गर्छ । यसले ४६ सालको आन्दोलन मान्दैन । ६२÷६३ सालको आन्दोलन मान्दैन । हाम्रो संघर्षको उपहास गर्छ ।’
रवि लामिछानेको नेतृत्वतिर लक्ष्य गर्दै गगनले उक्त दलले आफूलाई भगवान हुँ भनेर दाबी गर्न पाउने तर्क गरे । ‘जसले विधि मान्दैन । प्रक्रिया मान्दैन । ऊ जादूगर बनेर आउँछ । लोकरिझ्याइँ गर्दै संविधानमाथि प्रहार गर्छ । यस्तो विषय चिर्न कांग्रेसलाई नयाँ दललाई जस्तो छुट हुँदैन । हामी संघको सबैभन्दा ठूलो पार्टी,’ उनले भने, ‘अर्को पार्टीको साथीले भन्न पाउनुहुन्छ । यी त मानिसहरु हुन् । म त भगवान हुँ । मेरो त १० वटा हात छ । मेरो त १० वटा टाउको छन् । म त जादूगर हुँ । मसँग अचुक अस्त्र छ । म रातारात कायपलट गर्दिन्छु । चमत्कार गर्छु भनेर भन्न पाउनुहुन्छ । हामीले पाउँदैनौं । हामीले डेलिभरी दिनैपर्छ । सम्हाल्ने काम हाम्रो प्रत्येक तहका अध्यक्षले, प्रत्येक वडाका अध्यक्षले आफ्नो काम देखाउन सक्नुपर्छ ।’
डेलिभरी दिने विषयमा कांग्रेस अझै हारिरहेको थापाले बताए । गगनले सभापति लामिछानेमाथि ठग र अराजक भएको आरोपसमेत लगाएका छन् । माघ २४ गतेको प्रतिनिधिसभा बैठकमा लामो समयदेखि राजनीतिमा रहे पनि गफ गर्नेबाहेक कुनै काम गर्न नसकेको आरोप खेपेका थापाले शुक्रबार लामिछानेमाथि ठग र अराजकको आरोप लगाएका हुन् ।
शुक्रबार नेपाली कांग्रेस काठमाडौंको जिल्ला सम्मेलनमा ठगहरु भिआइपी हुन नसक्ने भन्दै त्यस्तालाई शक्तिको आडमा राज्यले छुट दिन नहुने बताए । ‘एउटा नेपाली नागरिकले देशको सार्वजनिक सम्पत्ति लुटेर लिए दण्ड हुन्छ । एउटा नेपाली नागरिकले सहकारीमा ठगे दण्ड हुन्छ । भ्रष्टाचारी भिआइपी हुँदैन । ठग भिआइपी हुन सक्दैन । अराजक भिआइपी हुँदैन,’ उनले लामिछानेलाई लक्षित गर्दै भने, ‘सुशासनलाई कांग्रेसले मन्त्र बनाउनुपर्छ । दोषी जोसुकै होस् । उम्कन हुन्न । कानुन सबैका लागि बराबर हुनुपर्छ । भिआइपीका नाममा सरकारले छुट दिन हुँदैन ।’
लामिछानेमाथि केही सहकारीको रकम हिनामिना गरेको आरोप छ । कास्कीमा उनीविरुद्ध उजुरी परेको छ । थापाले माघ २४ गतेको प्रतिनिधिसभा बैठकमा पनि लामिछानेमाथि सहकारी ठगीमा कारबाहीको माग गरेका थिए । त्यसपछि लामिछानेले थापालाई राजनीतिमा लामो समयदेखि लागे पनि काम गर्नुको साटो भाषणमा समय बिताएको र सस्तो प्रचारका लागि वक्तव्य दिने गरेको आरोप लगाएका थिए ।
‘नेपालको सार्वजनिक जग्गा कसैले हडप्छ भने सजाय पाउनुपर्छ । जतिसुकै शक्तिशाली होस्, जुनसुकै पदमा बसेको होस्, दण्ड पाउनुपर्छ । आमनागरिकहरूले निक्षेप संकलन गरेर जम्मा गरेको सहकारीमा ठगीको धन्दा चलाउनेमाथि कारबाही हुनुपर्छ,’ गगनले भनेका थिए ।
सहकारी ठगीधन्दाको मतियार भएका व्यक्ति कारबाहीको दायरामा आउनुपर्ने उनको भनाइ थियो । त्यसो गरिए सरकार सुशासनको पक्षमा साँचो रुपमा उभिएको अर्थ लाग्ने पनि उनको भनाइ थियो । ‘आमनागरिकहरूले निक्षेप संकलन गरेर जम्मा गरेको सहकारीमा ठगीको धन्दा चलाउँछ । ठगीको धन्दाको मतियार हुन्छ भने कानुनी कारबाहीको दायरामा आउनु पर्दैन ? कानुनले कारबाही गर्नु पर्दैन ?,’ महामन्त्री थापाले भनेका थिए ।
प्रतिनिधिसभा बैठकलाई सम्बोधन गर्दै सभापति लामिछानेले सरकारी जग्गा हडप्ने, नागरिकता कीर्ते गर्ने र सहकारीका ठगहरूलाई कारबाहीको दायरामा ल्याउन नयाँ दलले रोकेको हो भनी प्रश्न गरेका थिए । ‘सरकारी जग्गा कीर्ते गर्नेहरू आफ्नै दलभित्र छन् कि ∕ पहिला पार्टीभित्र कारबाही गरेर सुशासनको नयाँ कदम र उदाहरण दिने पो हो कि ? नागरिकता कीर्ते गर्ने र सहकारीका ठगहरूलाई कारबाहीको दायरामा ल्याउने पो हो कि ? सरकारमै भएजस्तो लाग्छ,’ लामिछानेले गगनप्रति लक्षित गर्दै भनेका थिए, ‘लामो समयसम्म सरकार नछोडेको जस्तो पनि लाग्छ । राजनीति र सदनमा भएको पनि वर्षौं बितेजस्तो लाग्छ । रोके छ चाहिँ केले ? नयाँ दलले ?’
राष्ट्रिय सभामा निर्वाचित कांग्रेस सांसद जितजंग बस्नेतले पनि सहकारी ठगीमा लामिछानेमाथि कारबाहीको माग गरे । ‘दुईटा नागरिकता, पासपोर्ट, को–अपरेटिभमा करप्सन गरेको कुरा उठेको छ । महामन्त्रीजीले संसद्मा पनि कुरा उठाउनुभयो,’ लामिछानेलाई लक्षित गर्दै बस्नेतले भने, ‘यस्ता तत्वहरुले देशमा विखण्डन ल्याउन खोजिरहेका छन् । कारबाही होस् ।’
