थुइक्क असत्तिऽ यस्तो नचाहिने कुरा पनि गर्ने हो ? पाप धर्म पनि थाहा छैन है तँलाई ? झूठको पनि पराकाष्ठा नै पो भो त ? लठबहादुर कड्किन्छ ?
मैले के गरेको छु ?
के गरिनस् ? आँखै अघि झूठो बोलेर अरुलाई बदनाम गराउन खोज्ने पनि तरिका हुन्छ नि !
ह्याऽ नकराऊ के तिमी । अब उनले जस्तो उत्तर खोजे मैले त्यस्तै दिएँ के गर्नु त ? गोफ्ले आफ्नो जवाफ फर्कायो । उनले खोजेजस्तो उत्तर भन्दैमा अरुलाई खसालेर बोल्न त भएन नि ! आपूmमात्र राम्रो बन्नका लागि तिमी जे सुकै गर गोफ्ले । तर तिमीले जे गरिरहेका छौं त्यो ठीक छैन चाहे रिसाऊ, चाहे खुसाउँ । डिंग हाँक्ने गोठालोजस्तो बन्ने काम नगर । बोल्न मन लाग्छ बोल बोल्न मन लाग्दैन आफ्नो बाटो लाग । लठबहादुर अझै रिसाउँछ ।
लठबहादुर जति रिसाए पनि गोफ्लेले नानीदेखि लागेको बानी कहाँ छोड्थ्यो र ?
उनकै नजिक रहेको उनका शासकलाई श्रीमान् मैले यसो गरेँ र त्यसो गरेँ भन्दै डिंग हाँक्न थालिगो । सँगैका लठबहादुर र लिडे हेराहेरबाहेक केही पनि गर्न सकेनन् । भैगो, जाउँ । लठबहादुर त्यहाँ बस्न मनै गरेन । तर, लिडे त्यो ठाउँ छोड्न मानिरहेको थिएन । किनकि उसलाई गोफ्लेको पारा अझै नियाल्नु थियो । उसको डिंग हाँक्ने तरिका निकै उत्कृष्ट थियो । जस्तो झूठो कुरालाई पनि ठ्याक्कै हो जस्तै गरेर बनाउन सक्ने क्षमता उसमा थियो । अरुले गरेको कामलाई मैले नै गरेको हुँ भनेर प्रमाणित गर्न निकै सिपालु थियो ।
गोफ्लेको यस्तो व्यवहारबाट लठबहादुर र लिडे वाक्क दिक्क भइसकेका थिए । यी दुईले जति नै मरिहत्ते गरेर काम गरे पनि त्यो सबैको जस गोफ्लेले लिइसकेको हुन्थ्यो । विचरा लठबहादुर र लिडे भने हेरेको हे¥यै हुन्थे । हात्ति आयो हात्ति आयो फुस्सा भनेजस्तै ।
नेपालीमा उखान छ, ‘काम गर्ने कालु, मकै खाने भालु’ । आजकाल त्यस्तै चलेको छ । देश डिंग हाँक्ने गोठालाहरुको पेरिफेरिमै घुमिरहेको छ । ‘बोल्नेको पिठो बिक्छ, नबाल्नेको चामल पनि बिक्दैन’ त्यसै कहाँ भनेको हो र ! लठबहादुर लिडेलाई भन्छ ।
त्यो बूढापाकाले भोगेरै बनाका हुन् त लठे । तँ सत्यको जित हुन्छ भन्दै मलाई पछि लगाए हिँडिस् । न तेरो राम्रो भयो न मेरो राम्रो भयो । चोर स्यालजस्तो त्यही गोफ्ले नै सर्वेसर्वा भयो । कहिलेकाहीँ त तेरो पछि लाग्न नै छाडिदिउँ जस्तो लाग्छ । तर के गर्नु गाँस छोड्नु साथ नछोड्नु भन्ने सम्झिन्छु । जति नै दोष खेप्नु परे पनि लठेलाई छाड्न सक्दिनँ ।
लठबहादुर भन्छन्, ‘अहिले पनि भन्छु सत्यको जित हुन्छ । ढिला होला जित सत्यकै हो । झूठ कति नै ठिक्ला र ? भ्रम कति नै पो फिजाउन सकिएला र ? दुई–चार दिनमात्र हो भ्रममा राख्ने । पछि थाहा पाएपछि त गोरु देखाएजस्तो खेदाइ हाल्छन् नि ।’
लठबहादुरको कुरा सुनेर लिडे मुसुक्क मुस्कुराउँछ । त्यो त हो नि दुई–चार दिनको के चुरीफुरि गर्नु ? अहिले समाज नै त्यस्तै छ । त्यही भएर समाज चिनेकाले होला गोफ्लेले डिंग हाँकेको सबैलाई चित्त बुझेकै छैन ।चित्त नबुझेर पनि के गर्नु गोफ्ले जति टाठो र छट्टु स्याल को छ र ? लिडे लठबहादुरको कुरा सुनिरहेको छ । हेर, यो छट्टु स्याले हो भित्रभित्रै क–कसलाई सिध्याउने हो थाहा छैन । अहिले दंग परिरहेका छन् भोलि सिद्धिने भएपछि बल्ल चाल पाउँछन् ।
कुरा त ठीकै हो लठे तर के गर्नु, पछि पछुताउने भन्ने कुरा कसले सम्झेको छ र ?
अहिलेलाई हेरेका छन् । हावामा दौडिएका छन् । आए अाँप गए झटारो कसको के नै पो जान्छ र ? डिंग हाँकेर लंका पिटिसक्यो । लिडेको कुरा सुनेर लठबहादुर सम्झाउन खोज्छन् ।त्यसो होइन ! गोफ्लेले जे गरिरहेको छ नि त्यो तेरो र मेरो मात्र होइन भविष्यमासमेत कसैको भलाइ हुने छैन । हजुरबाउले जोगाइदिएको सम्पत्तिमा मोज जसले पनि गर्छ नि । आफूले कमाएर देखाउन सक्नुप¥यो । पसिना बगाएर बुझेनस् के ?
लिडे ट्वाल्ल पर्छ कुरो बुझ्यो कि बुझेन कुन्नि ? मुण्टोमात्र हल्लाउँछ । बुझेर मुण्टो हल्लाको छस् कि बुझ्दै नबुझी हो ? लठबहादुर प्रश्न गर्छ । खै आधा बुझे आधा बुझिनँ । तैँले नबुझेको जस्तो नेपाली जनताले कसैले पनि बुझेका छैनन् । के हो के हो ? के गर्न खोजेको हो नै थाहा छैन ।
ल सुन, अहिले देशका टोलैपिच्छे राजा बन्या छन् । सातवटा प्रदेशमा सात राजा । ७५३ पालिका त्यत्ति नै राजा । अरु दायाँबायाको कुरै नगरौं, यी सब झूठका पोका हुन् । तँ हामीजस्तालाई भ्रममा राखेर आफ्नो स्वार्थ पूरा गरिरहेका छन् । दुई–चार जना बज्रस्वाँठ साइँदुवाहरु गोठालो लगायो बस्यो ।
भतुवालाई बिगौती भनेजस्तै । हौवामा पछि लागेका छन् । कुर्सीमा बसेपछि सबै बेहोसी भाको देखिनस् ?
कुरै सुन्नेवाला छैन । जसले गफ दिन सक्यो उही जान्ने ! एमाले, कांग्रेस, माओवादी, राष्ट्रवादी, स्वतन्त्रवादी, कमिसनवादी कुन्नि के–के वादी ! गरिबका नाम लिएर आउनेहरु गरिबमारा, भ्रष्टाचार विरोध गर्नेहरु गोठाला प्रयोग गरी कमिसनमारा हुन थालेपछि कसको आशा गर्ने हो र ?
लठबहादुरलाई जंग चलेको छरे आज त्यही भएर गोफ्लेमाथि निकै नै आक्रोशित भाको रे ? कुर्सीमा बस्नेहरुको गोठाला लठबहादुरले देख्नै नसक्ने भा छ । तर गोठालाहरु जनता झुक्याउने, भ्रम फिँजाउने डिंग हाँकेका हाँक्यै छन् । गाईभैँसी चराउन हिँडेका गोठालाहरुलाई अर्काको बाली बिग्रियोस् कि नासियोस् के मतलब छ र ?
गोठालाहरु त गाइदिने हो । मौकामा चौका हान्न आका हुन् । पाउँञ्जेल खान्छन्, खान पाउन छाडेपछि धारे हात तेस्र्याउँदै आफ्नै बाटो लाग्छन् । आज गोफ्ले पनि गज्जबको डिंग हाँकेर आफ्ना हितैषी लठबहादुर र लिडेलाई छाडेर अन्तै पल्केको छ, अन्तै सल्केको छ । अरुको जेसुकै होस् । गोफ्लेको भलो होस् ।
