अहिलेको गठबन्धनको सरकार पाँच वर्ष चल्छ । यसमा कुनै द्विविधा नराखे हुन्छ ।
विमलेन्द्र निधि
काठमाडौं– प्रधानमन्त्री पुष्पकमल दाहाल यतिबेला अमेरिकाको न्युयोर्कमा पुगेका छन् । संयुक्त राष्ट्रसंघको ७८औं महासभामा भाग लिन नेपाली प्रतिनिधिमण्डलको नेतृत्व गर्दै प्रधानमन्त्री दाहाल आइतबार न्युयोर्क पुगेका हुन् ।
प्रधानमन्त्री अमेरिका पुग्दा कार्यवाहक प्रधानमन्त्रीको जिम्मेवारी कांग्रेस उपसभापति पूर्णबहादुर खड्काले सम्हालिरहेका छन् । कांग्रेस गठबन्धन सरकारको प्रमुख घटक हो । अमेरिका हुँदै दाहालको टोली चीन जाने कार्यक्रम रहेको छ । तर उनी अमेरिका पुग्दै गर्दा नेपालमा भने सरकारको नेतृत्व परिवर्तनबारे चर्चा चलेको छ ।
अब केही दिनपछि, केही हप्तापछि, नभए महिनापछि संघको प्रधानमन्त्री कांग्रेसकै हो ।
गगन थापा
माओवादी केन्द्रका अध्यक्ष दाहाल नेतृत्वको सरकार गत पुस ११ गते बनेको थियो । सरकार बन्ने बेलादेखि नै संकटबाट सुरु भएको दाहाल नेतृत्वमाथि बेलाबेला अविश्वासको वातावरण सिर्जना हुँदै आएको छ । एमालेको समर्थनमा प्रधानमन्त्री बनेका दाहालले अप्ठेरो परिस्थितिको सामना गर्नुपरेपछि फागुनमा एमाले छाडेर कांग्रेस, जनता समाजवादी पार्टीलगायतको साथ लिए ।
यो गठबन्धनमा पनि बेलाबेला दाहाललाई सकस परिरहेको छ । त्यसैले आफूलाई सत्तामा टिकाइरहन समाजवादी मोर्चा नामक अस्त्र बनाएका छन् । एकीकृत समाजवादी, जनता समाजवादी पार्टी र नेत्रविक्रम चन्दको पार्टीलाई समेत अटाएर कांग्रेसलाई घुक्र्याउने काम दाहालले साउनबाटै थालेका हुन् । तर बेलाबेला कांग्रेसले एमालेसँग मिलेर नयाँ सरकार बनाउने चर्चा केही समय सेलाएपछि फेरि चल्न सुरु गरिहाल्छ ।
मेरो दृष्टिकोणले पुष्पकमल दाहाल नेतृत्वको सरकार पाँच वर्षसम्म जान सक्छ ।
डा. शशांक कोइराला
यस विषयमा कांग्रेसका नेताहरुले सार्वजनिक रुपमा टिप्पणी गर्न थालेका छन् । आइतबारमात्र नेपाली कांग्रेसका पूर्वउपसभापति विमलेन्द्र निधिले यो विषय हल्लामात्र भएको दाबी गरे । जनकपुरधाममा आयोजित पत्रकार सम्मेलनमा निधिले भने, ‘अहिलेको गठबन्धन सरकार पाँच वर्ष चल्छ । यसमा कुनै द्विविधा नराखे हुन्छ । पूर्वसहमतिअनुसार नै सरकारको नेतृत्व परिवर्तन हुनसक्छ ।’
वर्तमान गठबन्धनमा हेरफेरको कुनै सम्भावना नरहेको उनको जोड थियो । राजनीतिक स्थायित्वका लागि पनि अहिलेको सरकार पाँच वर्ष चल्नुपर्ने निधिको भनाइ थियो । राजनीतिक प्रक्रियामा दलहरू जुट्नु, फुट्नु, मोर्चा बनाउनुलगायत कुरा सामान्य भएको उनको भनाइ थियो ।
पछिल्लोपटक कांग्रेस महामन्त्री गगन थापाले पनि सरकारको नेतृत्व चाँडै परिवर्तन हुने दाबी गरेका थिए । गत बुधबार पोखरामा पार्टीको महानगर सम्मेलनमा उनले केही समयमै कांग्रेसको नेतृत्वमा सरकार बन्ने दाबी गरेका हुन् ।२०८४ सालको निर्वाचनलाई लिएर कांग्रेसका नेता कार्यकर्ता चिन्तित नहुन आग्रह गर्दै गगनले भनेका थिए, ‘अब केही दिनपछि, हप्तापछि, नभए महिनापछि संघको प्रधानमन्त्री कांग्रेस, सबै प्रदेशको मुख्यमन्त्री कांग्रेस हुन्छ, अनि ०८४ मा चुनाव हारिन्छ भनेर किन रुवाबासी ?’
आइतबार नै कांग्रेसका पूर्वमहामन्त्री डा. शशांक कोइरालाले भने अहिले सरकार परिवर्तनको सम्भावना नरहेको बताए । चितवन पुगेका उनले सञ्चारकर्मीसँग सत्ता गठबन्धनमा सामान्य खटपट भए पनि अहिले नै सरकार परिवर्तनको सम्भावना नरहेको बताएका हुन् ।
मलाई लाग्दैन अहिले नै सरकारको नेतृत्व फेरिन्छ भनेर ।
डा. शेखर कोइराला
‘मेरो दृष्टिकोणले पुष्पकमल दाहाल नेतृत्वको सरकार पाँच वर्षसम्म जान सक्छ, मलाई त्यस्तो लाग्छ,’ उनले भने । सरकारको स्थायित्व आवश्यक रहेको उल्लेख गर्दै कोइरालाले स्थायित्वले मात्रै देशको विकास सम्भव रहेको बताए ।विगतमा कतिपय समझदारी भएर पनि तोडिएको प्रसंग उल्लेख गर्दै उनले दाहाल साधारण व्यक्ति नभएको तर्क गरे ।
एमाले र माओवादी केन्द्रबीचको तीक्तताका कारण पुनःएमालेसँग मिल्न जानसक्ने अवस्था नभएको उनको दाबी थियो ।
कांग्रेसका अर्का नेता डा. शेखर कोइराला पनि कांग्रेसको पारा यही हो भने पाँच वर्ष दाहालकै नेतृत्वमा सरकार चल्ने बताउँछन् । भदौ २२ गते नयाँ बानेश्वरमा अनौपचारिक छलफलमा डा. शेखरलाई सरकारको नेतृत्व परिवर्तनबारे प्रश्न गरिएको थियो । जवाफमा उनले भनेका थिए, ‘मलाई लाग्दैन अहिले नै सरकारको नेतृत्व फेरिन्छ भनेर । धेरै सजिलो छ कांग्रेसकै कारण । यस्तै हो भने दाहाल नेतृत्वको सरकार पाँच वर्ष जान्छ ।’
