- भदौ २५:अब यो समाजवादी मोर्चाले जहाँ बदमासी हुन्छ, गालीगलौज हुन्छ, त्यो इँटको जवाफ पत्थरले दिने हो । दिनैप¥यो ।
- भदौ २४:केही समयपछि राष्ट्रियता, जनतन्त्र, जनजीविकाका विषयलाई लिएर लाखौं जनतालाई सडकमा ल्याउनुछ
- साउन २४:२०८४ मा पहिचान पक्षधरलाई टन्नै मत हाल्दिनुभयो भने सदनैबाट त्यही पारित हुन्छ । अहिलेको घटनाक्रमले नयाँ चेतना हामी सबैमा पैदा भएको छ र त्यो चेतनाको बलमा हामीले पहिचानसहितका प्रदेशहरुको नामकरण गर्न सकिन्छ
काठमाडौं– सत्ताको नेतृत्व सम्हालेका व्यक्ति दैनिक सरकार सञ्चालनमा ध्यान दिने र संयमता अपनाउनुपर्ने हो । तर वर्तमान प्रधानमन्त्री पुष्पकमल दाहालले भने दैनिकजसो जनता भड्काउने र ‘अराजक’ खालका अभिव्यक्ति दिन थालेका छन् । सत्ता सम्हालेको आठ महिनामा खासै उपलब्धि हासिल नगरेका प्रधानमन्त्री दाहाल अराजक अभिव्यक्तिमा उत्रेका हुन् ।
समाजवादी मोर्चाका कार्यक्रमलाई सम्बोधन गर्ने क्रममा आइतबार हेटौंडा पुगेका दाहालले लाखौं जनतालाई सडकमा ल्याउनुपर्ने अभिव्यक्ति दिएका थिए । सोमबार विराटनगर पुगेर पनि दाहालले कार्याकर्तालाई इँटाको जवाफ पत्थरले दिनुपर्ने बताएका छन् ।
कांग्रेस सहमहामन्त्री महेन्द्र यादवमाथि भएको आक्रमणको विषयलाई लिएर दाहालले बदमासी भएको ठाउँमा मोर्चा चुप लागेर बस्न नहुने बताएका हुन् । ‘भनेपछि उनीहरुको मनोबल कस्तो रहेछ, तपाईं हामीचाहिँ बडो रक्षात्मक ?,’ दाहालले उक्साउँदै भने, ‘त्यस्तो होइन अब । अब यो समाजवादी मोर्चाले जहाँ बदमासी हुन्छ, गालीगलौज हुन्छ, त्यो इँटको जवाफ पत्थरले दिने हो । दिनैप¥यो ।’
यसअघि आइतबार हेटौंडा पुगेका दाहालले राजतन्त्रका पक्षधरको सातो जाने गरी जनतालाई सडकमा ल्याउनुपर्ने बताएका थिए । ‘केही समयपछि राष्ट्रियता, जनतन्त्र, जनजीविकाका विषयलाई लिएर लाखौं जनतालाई सडकमा ल्याउनुछ,’ उनले भने, ‘ती प्रतिक्रान्तिकारी र दक्षिणपन्थी निरंकुशतावादी तथा सामान्ती र दलालको सातो जाने गरी जनताको तागत बढाउनुछ ।’
परिवर्तन ल्याएकालाई अहिले अपमानित गर्ने काम भइरहेकोसमेत दाहालको तर्क थियो । ‘हामीलाई अपमानित गर्न खोज्ने, घेरा हाल्न खोज्ने, जनताको त्यत्रो त्याग र बलिदानबाट ल्याएको परिवर्तनलाई अपमानित गर्न खोज्ने प्रवृत्तिलाई परास्त गर्नुपर्छ,’ प्रधानमन्त्री दाहालको भनाइ थियो ।
यसअघि साउन २४ गते प्रधानमन्त्रीले पहिचान पक्षधरको पक्षमा अभिव्यक्ति दिएका थिए । ‘२०८४ मा पहिचान पक्षधरलाई टन्नै मत हाल्दिनुभयो भने सदनैबाट त्यही पारित हुन्छ । अहिलेको घटनाक्रमले नयाँ चेतना हामी सबैमा पैदा भएको छ र त्यो चेतनाको बलमा हामीले पहिचानसहितका प्रदेशहरुको नामकरण गर्न सकिन्छ’ विश्व आदिवासी दिवसको अवसरमा आयोजित कार्यक्रममा सम्बोधन गर्दै दाहालले भनेका थिए । कोशी नामकरणको विरोधमा पहिचान पक्षधरले कोशी प्रदेशमा आन्दोलन मच्चाइरहेको सन्दर्भमा दाहालले उक्त भनाइ राखेका हुन् ।
आफू पहिचान र अधिकारको आन्दोलनकै नेता भएको भन्दै दाहालले आफूहरुले विगतमा शेर्पा प्रदेश, किरात प्रदेशको कुरा गरेको पनि बताएका थिए । ‘शेर्पा प्रदेशको कुरा किरातको पनि मैले गरेकै थिएँ । तर त्यसलाई कार्यान्वयन गर्न जति तागत सदनमा हामीलाई चाहिने हो, पहिचानका पक्षधरलाई चाहिने हो, त्यो शक्ति हामीलाई प्राप्त भएन त्यसले गर्दा लागू गर्न सकिएन,’ उनले भनेका थिए ।
दाहालको भनाइकै कारण अराजकता बढ्न थालेको कांग्रेस नेता डा. शेखर कोइराला बताउँछन् । ‘राजनीतिक, सामाजिक, आर्थिक कतै केही पनि ठीक छैन । सबै अराजकतातर्फ जान थाल्यो । अब कूटनीति पनि अराजकतातर्फ जान थाल्यो,’ शुक्रबार एक अनौपचारिक कार्यक्रममा डा.कोइरालाले भने, ‘कोशी प्रदेश नामकरणबाटै विवादमा छ । जातीय राज्यको कुरा प्रचण्डले बोलेका छन् । पार्टी अध्यक्ष भएर बोलेको भए केही थिएन तर देशको प्रधानमन्त्रीले आदिवासी जनजाति दिवसको दिन बोलेपछि परिस्थिति अर्कै भएको छ ।’
केही दिनअघि प्रमुख प्रतिपक्षी दल नेकपा एमालेका प्रमुख सचेतक पदम गिरीले पनि प्रधानमन्त्री दाहालले नै देशमा जातीय हिंसा भड्काउने खालको अभिव्यक्ति दिइरहेको बताएका थिए । भदौ १२ गते प्रतिनिधिसभा बैठकको विशेष समयमा गिरीले प्रधानमन्त्रीले जातीय राज्य बाँढ्छु भन्दै आपसी भाइचारा भड्काइरहेको आरोप लगाएका हुन् ।
‘म जातीय राज्यको पक्षमा छु तपाईंहरू जाग्नुहोस् उठ्नुहोस् र मलाई बल दिनुहोस् हाम्रो पार्टीलाई बहुमत दिनुहोस् म जातीय राज्य बनाउँछु भन्नुभएको छ । यो अस्वाभाविकमात्र होइन हिंसा भड्काउन र देशमा त्रास फैलाउन स्वयं प्रम मलजल गरिरहनुभएको छ । यसरी आपसी दाजुभाइको बीचमा विद्वेष र घृणा फैलाउने कामको आपत्ति मात्र होइन निन्दा पनि गर्छौं,’ गिरीले भनेका थिए ।
सोही दिन कांग्रेसकी ईश्वरी न्यौपानेले प्रधानमन्त्रीको अभिव्यक्ति संविधानविपरीत भएको टीप्पणी गरेकी थिइन् । ‘प्रधानमन्त्रीज्यूले ‘यदि हामीले निर्वाचन जितेको खण्डमा जातीय राज्य उपलब्ध गराउनेछौं’ भनी दिएको सार्वजनिक अभिव्यक्ति यो संविधानको भावनाविपरीत छ । जातीय, भाषिक र धार्मिक द्वन्द्व न्यूनीकरण गर्नेभन्दा झन् बल्झाउने अभिव्यक्ति सुन्दा कतै प्रधानमन्त्रीज्यूलाई नै यो संविधान र शासन व्यवस्थाप्रति अनास्था वा अविश्वास बढेर त होइन ?,’ उनले प्रश्न गरेकी थिइन् ।
