काठमाडौं– दक्षिण कोरियाले स्थानीय श्रम बजारमा जनशक्ति अभाव हुँदै गएपछि विदेशी श्रमिकलाई अवसर दिने गरी कार्यक्षेत्र फराकिलो पार्ने नीति लिएको छ । सेवा तथा उत्पादन क्षेत्रका विभिन्न उपक्षेत्रमा विदेशी श्रमिकलाई रोजगारीको अवसर नदिने कोरियाको कानुनी व्यवस्था भएपनि स्थानीय रुपमा स्वदेशी श्रमिकको अभाव हुन थालेपनि रोजगार अनुमति प्रणाली (ईपीएस)मार्फत गएका श्रमिकको लागि काम गर्ने क्षेत्र फराकिलो पार्ने नीति लिइएको हो ।
कोरिया सरकारको लचिलो नीतिकै कारण अहिले विभिन्न क्षेत्रमध्ये कुरियर सेवामा ई–९ भिसा भएकाले काम गर्न पाउने व्यवस्था गरिएको छ । कोरियामा गत शुक्रबार बसेको विदेशी श्रमिक नीति समितिको बैठकले ईपीएसमार्फत श्रम बजारमा काम गरिरहेका विदेशी श्रमिकलाई रोजगारीमा राख्न पाउने अनुमति प्रदान गरेको हो ।
कुरियर सेवामा श्रमिक अभाव हुन नदिन स्थानीय रोजगारदातालाई छिटोछरितो रुपमा श्रमिक माग गर्न त्यहाँको सरकारले आग्रहसमेत गरेको छ ।
त्यहाँको सञ्चारमाध्यम ‘द कोरिया टाइम्स’ले उल्लेख गरेअनुसार कोरियाकी नीति समन्वय मन्त्री बान की सुनले विदेशी श्रमिक राख्ने कुरियर सेवा प्रदायक कम्पनीलाई विदेशी श्रमिक मागसहितको आवेदन दिन अनुमति दिएको बताइएको छ । कुरियर सेवा प्रदायक कम्पनीमा कति नेपालीले अवसर पाउने हुन् त्यसबारे खुलाइएको छैन । यद्यपि कुरियर सेवा क्षेत्रमा नेपालीले उल्लेख्य अवसर पाउने अपेक्षा गरिएको छ । यसअघि एच–२ भिसा भएका कोरियन मूलका विदेशी श्रमिक तथा विद्यार्थी भिसा भएका विदेशीलाई मात्र कुरियर सेवामा काम गर्ने अनुमति रहेको उक्त सञ्चारमाध्यमले जनाएको छ । कोभिड–१९ पछि निरन्तर कामदार अभाव भएसँगै यस क्षेत्रमा ईपीएसमार्फत ई–९ भिसा भएकालाई पनि काम गर्ने अनुमति दिएको बताइएको छ ।
त्यसैगरी ठूला रोजगारदाता (३०० भन्दा बढी कामदार भएका)लाई पनि ई–९ भिसाको सुविधा दिइएको सञ्चारमाध्यममा जनाइएको छ । यसअघि तीन सयभन्दा कम श्रमिक भएका साना तथा मझौला उद्योगले मात्र ईपीएस अन्तर्गत ई–९ भिसा वाहक विदेशी श्रमिक राख्न पाउने कानुनी व्यवस्था रहेको उल्लेख गरेको छ ।
हाल नेपालबाट कोरियामा कृषि तथा पशुपालन र उत्पादनमूलक क्षेत्रमा इपिएसमार्फत नेपालीहरु रोजगारीको लागि गइरहेका छन् । कोरियाले श्रम बजारको दायरा फराकिलो पार्ने नीति लिएसँगै तोकिएका विभिन्न क्षेत्रमा अन्य मुलुकको तुलनामा नेपाली युवाले उल्लेख्य रुपमा रोजगारी पाउने अपेक्षा गरिएको छ । पछिल्लो पटक सिप बिल्डिङ (पानीजहाज निर्माण)मा पनि इपीएसमार्फत नेपालीहरुलाई रोजगारीका लागि कोरिया लैजाने तयारी भइरहेको छ । जसमा वैदेशिक रोजगार विभागअन्तर्गत इपिएस कोरिया शाखाले दक्षिण कोरियामा पानीजहाज कम्पनी अर्थात् ‘सिप बिल्डिङ’ मा जान आवेदन दिएकाहरूको भाषा परीक्षा आगामी असोज १ गतेदेखि गरिने जनाएको छ ।
-1752335779.jpg)
