काठमाडौं (प्रस)– यौन तथा प्रजनन स्वास्थ्यसम्बन्धी फिचर संग्रह ‘अभियान यौन तथा प्रजनन स्वास्थ्य र अधिकार सुनिश्चितता’ सार्वजनिक भएको छ । सञ्चारिका समूहले प्रकाशन गरेको उक्त पुस्तक शुक्रबार एक समारोहबीच राष्ट्रिय मानवअधिकार आयोगकी अध्यक्ष कमला पराजुली, स्वास्थ्य तथा जनसंख्या मन्त्रालयकी सहसचिव रोशनीदेवी कार्की, सञ्चारिका समूहकी अध्यक्ष विमला तुम्खेवालगायतले संयुक्तरुपमा सार्वजनिक गरेका हुन् ।
पुस्तकमा किशोरी तथा महिलाका यौन तथा प्रजनन स्वास्थ्यसम्बन्धी २० वटा फिचर सामग्री समेटिएका छन् । समूहका अनुसार महिलाको यौन तथा प्रजनन स्वास्थ्य अधिकारको विषयमा केन्द्रित रहेर देशभरका २० जना पत्रकार महिलालाई लेखनावृत्ति प्रदान गरिएको थियो । उनीहरुले सोही विषयसँग सम्बन्धित विभिन्न शीर्षकमा तयार पारेका फिचर समेटेर पुस्तक प्रकाशन गरिएको हो ।
पुस्तकमा किशोरी तथा महिलाले यौन तथा प्रजनन स्वास्थ्यसम्बन्धी भोग्दै आएका समस्याको अवस्था, उक्त समस्या समाधानका लागि राज्य तथा सरोकारवाला निकायले खेल्दै आएका भूमिकालगायतका विषयहरु उठाइएको समूहकी अध्यक्ष तुम्खेवाले जानकारी दिइन् । ‘प्रजनन तथा यौन समस्याको विषयमा समुदायस्तरमै पुगेर के–कस्ता समस्या छन् र ती समस्यालाई कसरी राज्य र सरोकारवाला निकायहरुले सम्बोधन गर्नुपर्छ भन्ने विषयमा यी २० फिचरले तथ्यमा रहेर समस्या र समाधानका उपायहरु स्पष्ट पारेका छन्,’ अध्यक्ष तुम्खेवाले भनिन्, ‘यी फिचरले विभिन्न समुदाय तथा समूहका किशोरी तथा महिलाका यौन तथा प्रजनन स्वास्थ्यका विविध पक्षलाई उजागर गरेको छ ।’
उनले महिलाको स्वास्थ्य अधिकारको सुनिश्चितताका निम्ति नीति, कार्यक्रम र कानुनलाई लैंगिक संवेदनशील बनाउन, नीति निर्माताहरुलाई सचेत र संवेदनशील बनाउन फिचर सामग्रीले दबाब दिने अपेक्षा व्यक्त गरिन् । समूहले पत्रकार महिलालाई यही पेसामा टिकाउन र उनीहरुलाई नेतृत्व तहमा पुग्न आवश्यक क्षमता विकासका लागि निरन्तर कार्यक्रम सञ्चालन गर्दै आएको जानकारीसमेत उनले दिइन् ।
समूहकी महासचिव वसन्ती वास्तोलाले कोशी, सुदूरपश्चिम र गण्डकी प्रदेशका पत्रकार महिलालाई क्षमता अभिवृद्धिको तालिम सञ्चालन गरेको र त्यसबाट छनोट भएकालाई आइपासको सहयोगमा लेखनवृत्ति दिइएको बताइन् ।
प्रकाशित मिति: आइतबार, असार १७, २०८० १३:०१
