मन भण्डारी
नेपालगञ्ज- मान्छेको जीवनसंग जोडिएको स्वास्थ्यमा समेत लापरवाही । मान्छेको स्वास्थ्यमा सानो समस्या हुंदा पनि अस्पताल र स्वास्थ्यकर्मीको भर पर्नु पर्ने हुन्छ । भगवानको रुपमा रहेका स्वास्थ्य कर्मीहरुले नै उपचारमा लापरबाही गरेपछि कसको के लाग्छ र ?
बर्दिया सोरहवाकी २२ वर्षीया रुमा थारुको उपचारको क्रममा भेरी अञ्चल अस्पताल नेपालगन्जका स्वास्थ्यकर्मी, रक्त संचार केन्द्रका कर्मचारीहरुको लापरबाहीका कारण स्वास्थ्य अवस्था गम्भीर बनेको छ । महिनावारी गडबडी भएर अत्याधिक रक्तश्रावका कारण गत पुस २१ गते भेरी अञ्चल अस्पतालमा भर्ना भएकी रुमाको उपचारका क्रममा फरक समूहको रगत चढाउँदा उनको दुइटै मिर्गौलामा गम्भिर समस्या देखा परेको छ ।
रुमालाई ओ पोजिटिभ रगत आवश्यक थियो, शिक्षण अस्पातल नेपालगन्जमा भर्ना भएकी अर्की बिरामी रुपा बोहरालाई बी पोजिटिभ रगत चाहिएको थियो । संयोगवश दुवै बिरामीका आफन्त एकैपटक रगतको लागि रक्त सञ्चार केन्द्र पुगेपछि त्यहाँका कर्मचारीले दुवै बिरामीका आफन्तलाई रगतको पोका दिएर पठाए । रगत दिने कर्मचारी तथा बिरामीका आफन्तबीच दोहोरो संवाद हुन नसकेका कारण साटिएर रगतको पोका एक अर्काेकोमा परेको रक्त सञ्चार केन्द्रका प्रमुख उपेन्द्र रेग्मी बताउँछन् । झ्यालको सानो प्वालबाट रगत दिने क्रममा नाम बोलाउंदा दुइटैको एउटै, एउटै नाम भएका कारण सांटिन पुगेछ, शिक्षण अस्पातल नेपालगन्जमा भर्ना भएकी बिरामी रुपा बोहराका आफन्तले लगेको रगत स्वास्थ्यकर्मीले थाह पाएर फिर्ता भयो तर रुमा थारुको लागि लगेको रगत अलिकति चढाएपछि मात्र थाह भएर फिर्ता आयो —रेग्मी भन्छन्— बिरामीका आफन्तले हतार गर्दा उक्त समस्या भएको हो ।
रगतको पोको लिएर बिरामीका आफन्तले अस्पताल कर्मचारीलाई दिएका थिए । शिक्षण अस्पतालका कर्मचारीले भने रगतको पोका फरक परेको थाहा पाए र बैंकमै फिर्ता पठाए । तर भेरी अञ्चल अस्पतालका नर्सले त्यही पोका जाँच नगरी बिरामीलाई चढाइदिइन् जसका कारण रुमाको दुवै मिर्गाैलामा समस्या देखियो ।
रुमाको दुवै मिर्गाैला फेल भएपछि पुस २३ गतेदेखि नै भेरी अञ्चल अस्पतालको आइसियुमा भर्ना गरी उपचार थालिएको थियो । असावधानीका कारण रुमाको मिर्गाैला फेल भएपछि अस्पतालले सो घटना लुकाएर उनको निःशुल्क उपचार गर्दै आएको बुझिन्छ ।
रुमा गाइने वार्डकी बिरामी भए पनि अस्पतालका फिजिसियनहरुले तत्काल सुविधा सम्पन्न अस्पतालमा रिफर गरेर थप उपचारको व्यवस्था मिलाउन अस्पताल प्रशासनलाई सुझाव दिएको बुझिएको छ । तर प्रशासनले घटनालाई गुपचुप राख्न खोजेका कारण रुमाको समस्या झनै जटिल बन्दै गएकोछ । घटनालाई लिएर जिल्ला समन्वय समिति बर्दियाका प्रमुख शंकरप्रसाद थारु, बारबर्दिया नगरपालिकाका प्रमुख कविर चौधरी लगायतको टोलीले बिहीबार अस्पताल प्रशासन, चिकित्सकसँग छलफल गरी दोषी माथि कारबाहीको माग गरेका छन् । मिर्गाैलामा समस्या देखिनेबित्तिकै रुमाको मुख सुन्निने, सहन नसक्ने गरी पेट दुख्ने जस्ता समस्या देखिएको थियो । त्यसपछि अस्पतालले आफ्नै खर्चमा थप उपचारका लागि अस्पातलका फिजिसियन डाक्टर खगेन्द्र शाह नेतृत्वको टोलीले रुमालाई काठमाडौंको वीर अस्पताल लगेको छ ।
रगत चढाउँदा दुई पटक चेक गरेर चढाउनुपर्छ तर ड्युटीमा रहेका कर्मचारीले क्रस चेक नगरि, हेर्दै नहेरी फरक समूहको रगत बिरामीलाई चढाइएछ, यो ड्युटीमा रहेका कर्मचारीको गम्भिर असाबधानि भएको निमित्त अस्पताल प्रमुख डाक्टर कृष्ण आचार्यले बताए । रगत चढाएको केही समयपछि रुमाको शरीरमा एलर्जी देखियो । त्यसपछि मात्रै ड्युटीमा रहेका नर्सहरुले फरक समूहको रगत चढाइएकोे बुझिएकोछ । त्यो घटना थाहा पाउनेबित्तिकै बिरामीलाई आइसियुमा भर्ना गरेर उपचार गरिएको अस्पतालले जनाएको छ । चिकित्सकले दिएको प्रेसक्रिप्सन भन्दा फरक समूहको रगत बिरामीलाई चढाउने स्टाफ नर्स कल्पना वि.क.लाई अस्पतालले निलम्बन गरिसकेको जानकारी अस्पतालले दिएकोछ ।
