काठमाडौं– राइड सेयरिङ प्लेटफर्म ‘सजिलो साथी’ले आक्रामक योजनाका साथ सेवा विस्तार गरेको छ । राइड सेयरिङको प्रतिस्पर्धी बजारमा फरक प्लेटफर्मको रुपमा स्थापित गर्ने योजनाका साथ सजिलो अघि बढेको बिहीबार आयोजित पत्रकार सम्मेलनमा जानकारी दिइयो ।
यही क्रममा कम्पनीले वरिष्ठ विमान चालक तथा कलाकार क्याप्टेन विजय लामालाई सहसंस्थापक र कोलाबोरेटिभ क्याटलिस्ट प्रालिलाई पनि साझेदारको रुपमा भित्र्याएको छ । यो साझेदारीले कम्पनीको सेवालाई थप मजबुत्, प्रभावकारी र विश्वसनीय बनाउन महत्त्वपूर्ण भूमिका खेल्ने कम्पनीको दाबी छ । हाल करिब डेढ लाख सेवाग्राहीसँग जोडिएको सजिलोले आगामी एक वर्षमा १० लाख ग्राहक पुर्याउने लक्ष्य राखेको छ ।
नेपाली चलचित्र तथा उड्डयन क्षेत्रमा ४० वर्षदेखि क्रियाशील लामाले सजिलो साथीसँग जोडिन पाएकोमा खुसी व्यक्त गरे । उनले युवाहरुलाई स्वदेशमै रोजगारी प्रदान गर्ने उद्देश्यले सुरु भएको यो प्लेटफर्मलाई स्थापित गर्न आफ्नो अनुभवलाई प्रयोग गर्ने प्रतिबद्धता जनाए ।
‘सजिलो नामै काफी छ,’ पत्रकार सम्मेलनमा क्याप्टेन लामाले भने, ‘उत्कृष्ट सेवामार्फत विगत ४० वर्षमा मैले विमान चालक, चलचित्रकर्मी र सञ्चारकर्मीको रुपमा पाएको विश्वास सजिलो साथीमा पनि स्थापित गर्ने छु ।’
उनले नेपाली पुँजीलाई विदेसिनबाट रोक्न सबैले साथ दिनुपर्नेमा जोड दिए । ‘हाम्रो पुँजी बाहिर जान नदिन नेपालमै बनेको यो एप प्रयोग गरौं,’ उनले भने । क्याप्टेन लामाले राइडरले आफ्नो पेसाप्रति गर्व गर्नसक्ने वातावरण निर्माण गर्नुपर्नेमा जोड दिए । उनले आफू पनि राइडरको रुपमा जोडिने घोषणा गरे ।
‘नेपालमै बनेको एप’को रुपमा प्रचार गरिएको यो प्लेटफम सन् २०२२ बाट परीक्षणको रुपमा सञ्चालनमा आएको थियो । सजिलो साथीको प्रमुख कार्यकारी अधिकृत (सिइओ) अमिर लामाले लामो अध्ययन र परीक्षणपश्चात् सजिलोलाई भरपर्दो र विश्वासिलो बनाइएको बताए । उनले चालक र यात्रुको सुरक्षा कम्पनीको पहिलो प्राथमिकता भएको जानकारी दिए ।
‘यात्रु र चालक दुवैका लागि बिमा सुविधा उपलब्ध गराउन शिखर इन्स्योरेन्ससँग सम्झौता गरेका छौं,’ सिइओ लामाले भने, ‘यसबाहेक कमिसनबाट प्राप्त रकमको १० प्रतिशत जम्मा गर्ने गरी सजिलो कोषसमेत व्यवस्था गरिएको छ, जसबाट यात्रु र चालकलाई आपत्कालीन समयमा सेवा प्रदान गरिने छ ।’
कम्पनीका प्रबन्ध निर्देशक दिवाकर खनालले नेपालमै पहिलोपटक ‘जियोबेस फेयर सिस्टम’ सुरु गर्न लागेको जानकारी दिए । हाल काठमाडौं उपत्यकामा मात्र सेवा दिइरहेको यस कम्पनीले आगामी छ महिनाभित्र देशभर सेवा विस्तार गर्ने जनाएको छ ।
कम्पनीले आगामी फागुन १ गतेबाट चालकबाट कमिसन लिने पनि घोषणा गरेको छ । जसमा दुईपांग्रे सवारीमा १० प्रतिशत, क्याबमा छ प्रतिशत र हात्तीगाडीमा पाँच प्रतिशत कमिसन लागू गरिने जानकारी दिइएको छ ।
