अछाम/अछामका समाजसेवी तथा राजनीतिज्ञ लाल बहादुर शाहीको कार्तिक १२ गते सोमवार निधन भएकोछ ।
लामो समय देखि फोक्सो सम्वन्धि रोगबाट पीडित शाहीको कार्तिक १३ गते हिन्दु संस्कार अनुसार स्थानीय कोलिमोरा नदिमा दाहसंस्कार गरिएको थियो । शाहीका छोराहरु लेखेन्द्र बहादुर शाही, प्रेम बहादुर शाही र अमर बहादुर शाहीले दागबत्ति दिएका थिए । अन्तिम दाहासंस्कारमा शाहीका सयौं आफन्तजन, शुभचिन्तकहरुको सहभागिता थियो ।
बुद्धि शाहीका नाती, जुकु शाही र चितरा शाहीका छोरा शाहीको जन्म १९९४ फाल्गुण १० गते आईतवार अछामको नाडा कुरिगाउँमा भएको हो । शाहीका भाई श्री कालिकेश्वरी मा.बि. तुर्माखाँद अछामका निवर्तमान प्राचार्य लोकेन्द्र बहादुर शाहका अनुसार, ३ बर्षको बाल्य अवस्थामा वुवा गुमाएका शाहीले प्रारम्भिक शिक्षा घरमैं कान्छावुवा स्वर्गिय पूर्ण बहादुर शाहीबाट लिएका थिए । १६ बर्षको उमेरमा दैलेख छरङ्गकी गौरा शाहीसँग बिबाह गरेका शाहीका ३ छोरा र ३ छोरी छन् ।
शाहका अनुसार, २०२२ साल देखि २०३२ साल सम्म नाडा गाउँ पञ्चायतको सचिव रहेका उनले २०२७ सालमा नेपालगञ्जमा ६ महिने सचिवको तालिम लिएका थिए । २०३९ साल देखि राजनीतिमा सक्रिय शाही २०३९ सालमा सम्पन्न गाउँ पञ्चायतको निर्वाचनमा प्रधानपञ्चको निर्वाचन लडेका थिए । २०४३ सालमा पुनः प्रधानपञ्चको चुनाव लडेका शाही दोश्रो पटक पनि पराजित भएका थिए । २०४९ सालमा राष्ट्रिय प्रजातन्त्र पार्टीका तर्फबाट नाडा गाउँ विकास समितिको अध्यक्ष पदका लागि निर्वाचनमा होमिएका थिए । गोपिराम जैशी बागि उम्मेद्धार लडेपछि उक्त निर्बाचनको नतिजा पनि उनका पक्षमा हुन सकेन । जैशीले ९६ मत प्राप्त गर्दा शाही ३४ मतको झिनो मतले पराजित भएका थिए ।
राप्रपाका तर्फबाट २०५४ मा पुनः नाडा गाविसको अध्यक्षको उम्मेद्धार बनेका शाहीले राजनीतिबाट लाभ हासिल गर्न नसकेपनि निष्ठाको राजनीति गर्न भने जीवनको उत्तराद्र्ध सम्म छाडेनन् । लामो समय राप्रपाबाट राजनीति गरेका उनले पार्टी परित्याग गरि २०५६ सालमा नेकपा एमाले प्रवेश गरेका थिए । उनी पार्टीको जिल्ला समितिको सल्लाहकार सदस्य रहेका थिए ।
राजनीतिका अलावा सामाजिक कार्यमा समेत उत्तिकै सक्रिय रहेका उनले २०१८ सालमा नाडामा स्थापना भएको श्री कालिकेश्वरी प्रा.वि.को संस्थापक कोषाध्यक्ष, २०३३ सालमा उक्त विद्यालयको व्यवस्थापन समिति अध्यक्ष भएर सशक्त रुपमा कार्य गरेका थिए । त्यसैगरी २०३९ साल देखि २०४२ साल सम्म तुर्माखाँद स्थित श्री कालिकेश्वरी निमाविको व्यवस्थापन समिति सदस्य रहेका शाही २०४५ देखि २०४७ साल सम्म श्री कालिकेश्वरी मा.वि. तुर्माखाँदको व्यवस्थापन समितिको अध्यक्ष भएर कार्य गरेका थिए भने सोही विद्यालयको २०५४ देखि २०५६ सम्म व्यवस्थापन समिति सदस्य भएर जिम्मेवारी बहन गरेका थिए ।
शाहीले २०६८ देखि २०६९ सम्म बागेश्वरी व्यवस्थापन मूल समितिको संस्थापक सदस्य, २०६९ देखि २०७२ सम्म बागेश्वरी व्यवस्थापन केन्द्रीय कार्य समितिको कोषाध्यक्ष हुँदै २०७२ देखि हाल सम्म बागेश्वरी धार्मिक तथा प्राकृतिक, पर्यटकिय क्षेत्र विकास समितिको प्रमुख संरक्षकको जिम्मेवारी सम्हालेका शाहीले समाजमा पुर्याएको योगदानको कदर गर्दै श्री कालिकेश्वरी मा.वि. नाडा, श्री कालिकेश्वरी उ.मा.वि. तुर्माखाँद, बागेश्वरी धार्मिक तथा प्राकृतिक, पर्यटकिय क्षेत्र विकास समिति लगाएतले उनलाई सम्मान गरेका थिए ।
कार्तिक १२ गते बिहान ११ बजे आफ्नै निवासमा बोल्दा—बोल्दै उनको निधन भएपछि सिङ्गो अछाम जिल्ला शोकाकुल बनेको थियो । उनको निधन प्रति अछामी नेता तथा सामाजिक अभियन्ताहरुले दुःख प्रकट गरेकाछन् । शाहीको निधनले अछाम जिल्लालाई अपूरणिय क्षति पूगेको उनीहरुले बताएका छन् । एक कुशल अभिभावक, ईमान्दार राजनीतिज्ञ र असल समाजसेवीको छवि बनाएका शाहीको निधनबाट आफुहरु दुःखित भएको शाहीका भाई तथा बागेश्वरी धार्मिक तथा प्राकृतिक, पर्यटकिय क्षेत्र विकास समितिका अध्यक्ष लोकेन्द्र बहादुर शाहले बताए । उनका अनुसार, शाहीको सम्मानमा संस्थाको आधा झण्डा झुकाउनुका साथै कार्यालयमा शोक पुस्तिक राखिएको थियो ।
