नेपालगञ्ज/नेपालगञ्जमा निर्माणाधिन अत्याधुनिक बसपार्कमा चरम लापरवाही देखिएको छ ।
नेपालगञ्ज उपमहानगरपालिका—४, बिद्युत रोडमा निर्माणाधीन अत्याधुनिक बसपार्क निर्माण कार्यमा सुस्तता र चरम लापर्बाही देखिएको हो ।
नेपालगञ्ज उपमहानगरपालिकाले नगर विकास कोषसँगको ऋण लगानीमा अत्याधुनिक र सुविधा सम्पन्न बसपार्क निर्माण कार्य अगाडि बढाएको थियो ।
पन्ध्र महिनाभित्र निर्माण सक्ने गरी युनाइटेड बिल्डर्सले अप्रिल २०१६ मा ठेक्का लिएको थियो । अव्यवस्थित रुपमा सञ्चालित नेपालगञ्जको बसपार्कलाई अत्याधुनिक र सुविधा सम्पन्न बनाउन १५ महिनाभित्र निर्माण सक्ने सम्झौता भए पनि सम्झौताअनुरुप निर्माण सम्पन्न नभएपछि दुई महिनाअघि पुनः म्याद थप गरिएको थियो । ठेकेदार कम्पनीको लापर्बाहीका कारण नेपालगञ्जको यातायात व्यवस्थापनमा समस्या देखिएको छ ।
निर्माण ढिलाइ भएपछि यातायात साधन पार्किङ गर्न, टिकट काउन्टर व्यवस्थापन गर्न र यात्रुलाई गाडी चढ्न तथा टिकट काट्न समस्या भएको छ । निर्माण कम्पनीले गत जुन महिनाभित्र काम सक्ने गरी रु २० करोड लागत अनुमानमा ठेक्का लिएको नेपालगञ्ज उपमहानगरपालिकाले जनाएको छ । साढे चार बिगाह क्षेत्रफलमा फैलिएको बसपार्कलाई आधारभूत सुविधायुक्त बनाउन निर्माण कार्य थालिएको थियो । बसपार्क भित्र टर्मिनल भवन, सपिङ बिल्डिङ्ग, शौचालय, चमेनागृह, पक्की पार्किङ क्षेत्र निर्माण गर्न थालिएको छ । निर्माण कम्पनीले मुख्यद्वार र पक्की पर्खाल निर्माणको समेत जिम्मा लिएको उपमहानगरपालिकाले जनाएको छ । बसपार्कको निर्माण कार्यका लागि बाटोमा जथाभावी माटो थुपारिँदा गाडी पार्किङ्गमा समस्या भएको यातायात व्यवसायीको गुनासो छ ।
उपमहानगरपालिकाका अनुसार, समयमै ठेकेदारले काम नसकेकाले दोस्रो पटक म्याद थप गरिएको छ । उपमहानगरपालिकाले तीन महिनाका लागि दोस्रो पटक म्याद थप गरिदिएको छ । तर यो समयमा पनि निर्माण सम्पन्न हुने छाँट भने देखिँदैन । निर्माण शुरु भएको दुई वर्षमा जम्मा ३० प्रतिशत मात्र काम सम्पन्न भएका कारण दुई महिनामा निर्माण सम्पन्न हुने सम्भावना निकै न्यून रहेको यातायात व्यवसायीहरुको भनाई छ । जानकारी अनुसार, धेरै ठाउँको ठेक्का लिने र काम समयमा नगरिदिने समस्याको शिकार नेपालगञ्ज बसपार्क पनि भएको छ ।
