नेपालगञ्ज/एउटै मन्त्रालयका दुई वटा कार्यालयहरु आपसमा लडिरहेका छन् । संस्कृति, पर्यटन तथा नागरिक उड्ययन मन्त्रालय मातहतका नेपालगञ्ज नागरिक उड्ययन कार्यालय र नेपाल बायु सेवा निगम बिच नेपालगञ्ज स्थित बिमानस्थल भित्रको जग्गाको बिषयमा लडाईं भईरहेको हो ।
जानकारी अनुसार, बिमानस्थल हाता भित्र ३ कठ्ठा ३ धुर जग्गामा निर्मित नेपाल बायु सेवा निगम पश्चिमाञ्चल क्षेत्रिय केन्द्र अन्र्तगतको ईञ्जिनियरिङ्ग भवनका बिषयमा बिबाद सृजना भएको हो ।
बिमानस्थल हाता भित्र आफ्नो जग्गामा हालको टर्मिनल भवन नवनिसकेको अवस्थामा नेपालगञ्ज नागरिक उड्ययन कार्यालयले तत्काल टर्मिनल भवन प्रयोजनका लागि बनाएको भवन बिना आधार नेपाल बायु सेवा निगमले प्रयोग गरिरहेको जनाउँदै खालि गर्न अल्टिमेटम दिँदा समेत बायु सेवा निगम बिगत ३५ बर्षदेखि प्रयोग गर्दैआएको बताउँदै खाली नगर्ने बताईए पछि उक्त संरचना कार्यालयले भत्काएको छ ।
कार्यालयले असार १७ गते नेपालगञ्ज उपमहानगरपालिका लगाएत सरोकारवालाहरुलाई एक पत्र लेखि बायु सेवा निगमले बिना आधार प्रयोग गरिरहेको जिर्ण संरचना भत्काई यात्रुहरुको सेवा सुबिधाका लागि नयाँ यात्रु प्रतिक्षालय, चमेना गृह निर्माण गर्नका लागि भवन खालि गरिदिन पटक—पटक अनुरोध र पछिल्लो पटक ७ दिनको समय दिई जानकारी दिँदा समेत अटेर गरेको र पूरानो भवन भत्काई नयाँ प्रतिक्षालय, चमेना गृह निर्माण गर्ने कार्यको लागि टेण्डर प्रकृया पूरा भईसकेको तथा केही दिनभित्रै निर्माण कार्य शुरु हुने भएकाले खालि गराउन लागेको जनाएको थियो । उसले नेपालगञ्ज उपमहानगरपालिकाबाट प्रतिनिधि पठाईदिन माग गर्नुका साथै जिल्ला प्रशासन कार्यालय र जिल्ला प्रहरी कार्यालयबाट आवश्यक सहयोग मागेको थियो भने नेपाल बायु सेवा निगमलाई असार १८ उपस्थित भई सामानहरु जिम्मा लिन भनेको थियो । तर निगमले नेपाल बायु सेवा निगम पश्चिमाञ्चल क्षेत्रिय केन्द्र अन्र्तगतको ईञ्जिनियरिङ्ग भवन बिगत ३५ बर्ष अघि देखि आफ्नै लागतमा भवन निर्माण गरि निर्बाध रुपमा निगमले प्रयोग गर्दैआएकोमा एकाएक खाली गर्न भनि नागरिक उड्ययन कार्यालयले पत्राचार गरेको गुनासो गरेको थियो । निगमका निमित्त क्षेत्रिय प्रबन्धक किरणमान श्रेष्ठले सोही भवनबाट दैनिक उडान कार्य सञ्चालन गरि समस्त दुर्गम भेगका यात्रुहरुलाई सेवा गरिरहेको जनाउँदै भवन हटाएमा उडान सम्बन्धि सम्पूर्ण कार्यहरुमा अवरोध आउने जनाउँदै भवन खाली गराउने कार्य रोक्न सबै सरोकारवालाहरुलाई अनुरोध गर्दै बिभिन्न कार्यालयहरुमा जाँदै गर्दा कार्यालयले उक्त संरचना भत्काएको थियो ।
श्रेष्ठले उक्त जग्गा, भवन भोगचलनका लागि आवश्यक कागजातहरु आफुसँग सुरक्षित भएको बताएका छन् भने नागरिक उड्ययन कार्यालयका प्रमुख प्रताब बाबु तिवारीले निगमसँग कुनै प्रमाण नभएको बताउँदै कार्यालयसँग जग्गा, भवनको लालपुर्जा भएको बताएका छन् । यस बारेमा नेपालगञ्ज वडानम्बर २० का वडाध्यक्ष कृष्ण कार्की बर्षाैं देखि बायु सेवा निगमले भोगचलन गर्दै आएको जग्गा र भवन हचुवाका भरमा उड्ययन कार्यालयले खाली गराएको बताए ।
उड्ययन कार्यालय प्रमुख तिवारीका अनुसार, खजुराबाट राँझामा बिमानस्थल सर्दा अस्थाई टर्मिनलको रुपमा उक्त भवन कार्यालयले निर्माण गरेको र निगमले उक्त भवन प्रयोग गरेको थियो । त्यसबेला कुनै पनि अरु एअरलाईन्स नहुँदा बायु सेवा निगमले प्रयोग गरेको र पछि मोहियानी हकको रुपमा आफ्नो भनेर अडडि कसेको बताए ।
सप्रमाण उड्ययन कार्यालयको जग्गा र भवन भएको उल्लेख गर्दै तिवारीले यात्रुहरु चाप र आवश्यकतालाई मध्येनजर गर्दै प्राधिकरणको स्विकृत कार्यक्रम बमोजिम नयाँ संरचना निर्माण गर्न खोज्दा निगमले असहयोग गरेको बताए । कार्यालयले आफ्नो परिसरको संरक्षण र सम्बद्र्धन गर्ने कार्य गर्दछ, त्यहि बमोजिम जिर्ण उक्त भवन खाली गर्न चार पटक पत्राचार गर्दा समेत नहटाएपछि प्रशासन, प्रहरी र उपमहानगरपालिकाको रोहवरमा उक्त भवन भत्काईएको उनले बताए । अन्तिम पटक पनि भवन भत्काउँदा उपस्थित भई सरसामान बुझेर लैजान अनुरोध गर्दा समेत निगमका प्रतिनिधिहरु नआएपछि नियमानुसार सरसामानको लगत उठाई सरोकारवालाहरुको रोहवरमा भवन भत्काएको उनको भनाई छ ।
सबै एअरलाईन्सको ईञ्जिनियरिङ्ग युनिट सञ्चालनका लागि कार्यालयले कोठा उपलब्ध गराएको बताउँदै तिवारीले निगमलाई पनि अन्यत्र सो कार्यका लागि कोठा उपलब्ध गराउने बताएतापनि निगमले जिद्धि गरि अटेर गरेको बताए । सम्पत्ति अधिग्रहण गरेर बस्ने, हटाउन खोज्दा सेवा रोक्छौं भन्न कसैले पनि पाउँदैन —तिवारीले भने—बिकास बिरोधी कार्य हाम्रा लागि स्विकार्य छैन, प्रतिक्षालय र क्याण्टिनका लागि उक्त भवन भत्काएर नयाँ काम अघि बढिसक्यो ।
